Ինչու՞ է կարևոր կրել արևային ակնոց. ոչ թե ոճի, այլ տեսողության մասին

Ամառը Հայաստանում ուղղակի արևոտ չէ․ այն ակտիվ ուլտրամանուշակագույն ճառագայթման սեզոն է: Երևանի մոտ 300 արևոտ օրով ու ծովի մակերևույթից բարձր գտնվելու պատճառով UV ճառագայթման ինտենսիվությունը աշխարհի շատ մայրաքաղաքներից ավելի բարձր է: և մինչ մաշկին արևապաշտպան ենք քսում, աչքերին հաճախ ոչ մի պաշտպանություն չենք ապահովում:

Ի՞նչ է անում UV ճառագայթը ձեր աչքերի հետ

Ուլտրամանուշակագույն ճառագայթումը (UV-A և UV-B) ազդում է ոչ միայն մաշկի, այլև աչքի բոլոր հիմնական կառուցվածքների վրա: Երկարաժամկետ ազդեցությունը կապված է մի շարք լուրջ հիվանդությունների հետ.

Կատարակտ (Cataract)՝ ոսպնյակի պղտորում, որի հիմնական գործոններից մեկը UV ճառագայթումն է: Ըստ Առողջության Համաշխարհային Կազմակերպության, աշխարհում կատարակտի դեպքերի մոտ 20%-ը կանխարգելելի կլիներ պատշաճ UV պաշտպանությամբ:

Տարիքային մակուլյար դեգեներացիա՝ ցանցաթաղանթի կենտրոնական հատվածի վնասում, որը տեսողության կորստի առաջատար պատճառն է 50+ տարիքի անձանց մոտ:

Ֆոտոկերատիտ՝ ըստ էության, արևայրուք աչքի մակերեսի վրա: Ժամանակավոր, բայց շատ ցավոտ:

Ո՞րն է տարբերությունը անորակ և որակյալ արևային ակնոցի միջև

Ահա թե որտեղ է գնի հետ կապված ամենատարածված թյուրըմբռնումը: Ոսպնյակի մգությունը UV պաշտպանության հետ ուղղակի կապ չունի: Մուգ ոսպնյակ ունեցող անորակ ակնոցը կարող է առանց UVA/UVB ֆիլտրի ավելի վատ լազդեցություն ունենալ, քան առհասարակ ակնոց չկրելը։

Ինչու՞: Մուգ ոսպնյակն աչքի բիբը լայնացնում է, ինչի արդյունքում ավելի շատ UV ճառագայթ է ներթափանցում, եթե ոսպնյակն իրականում չի ֆիլտրում:

Որակյալ արևային ակնոցը տրամադրում է.

• 100% UVA + UVB պաշտպանություն (UV400 ստանդարտ) — ոչ 99%, ոչ «UV protection», այլ ամբողջական 400 նանոմետր ալիքի արգելակում
• Ոսպնյակի ճիշտ օպտիկական որակ — Essilor-ի պոլյարիզացված ոսպնյակներն, օրինակ, վերացնում են արտացոլված ճառագայթման ճնշումն ու նվազեցնում աչքի հոգնածությունը
• Ծածկույթի ամբողջականություն — լավ շրջանակը պաշտպանում է ոչ միայն ուղիղ, այլ կողային ու ստորին ուղղություններից ներթափանցող ճառագայթումից
• Ոսպնյակի կայունություն — ցածրորակ ոսպնյակներն արագ վնասվում ու ճաքում են, ինչն ազդում է ինչպես պաշտպանության, այնպես էլ տեսողության հստակության վրա

Ո՞վ է հատկապես ռիսկի գոտում

Արևային ակնոցն անհրաժեշտ է բոլորին, բայց հատկապես կարևոր է.

• Ակնոց կամ կոնտակտ ոսպնյակ կրողների համար — տեսողության կորեկցիան ու պաշտպանությունն առանձին խնդիրներ են, անհրաժեշտ է երկուսն էլ ապահովել
• Վարորդների  համար — ճանապարհի մակերեսից արտացոլված լույսն կատարյալ պայման է ոչ կոմֆորտ և ռիսկային պայմաններ ստեղծելու համար
• Ջրի կամ ձյան մոտ ժամանակ անցկացնողների համար — արտացոլման պատճառով UV ճառագայթումն ավելի ինտենսիվ է
• Երեխաների համար — հաճախ մանկական ակնոցների ոսպնյակն ավելի թափանցիկ է ու ոչ այնքան արդյունավետ է  ֆիլտրում UV-ն, անհրաժեշտ է շատ ուշադիր ընտրել մանկական արևային ակնոց